کاک فوئادی خۆشه‌ویست !
کاتێک ته‌نگ و چه‌له‌مه‌کانی ڕۆژگار بیرم ده‌هاویژنه دونیای پڕ له شانازی گه‌له‌که‌مانه‌وه، له" تاله سوار" گیر ده‌که‌م و له بن دار قه‌زوانه‌که‌ی به‌ر پێت، پێی ماندوو له ڕیگا ، که‌له‌بچه ده‌بێت و مه‌نگی ئه‌ستێره سووره‌که‌ی سه کیله‌که‌ت ده‌بێت .
کاتێک ده‌مه‌ویت پێنوسه‌که‌م بخسێنمه سه‌ر کاغه‌ز و باسێکت له سه‌ر بنوسم ،ده‌ستانم شه‌رم ده‌یانگرێت و بیرم سه‌هۆڵ ده‌به‌ستێت .
تۆ له به‌ر کام شه‌وقی چرای ئه‌م ئاودانیه‌دا، وانه‌کانی ئه‌دیسونت* ده‌کرده نیروگای هه‌ڵگرسانی رووناکی ئه‌م گه‌له چه‌وساوه‌یه ؟
هه‌سته‌وه با شتێکت پێ بلێم! له دوای نه‌مانت ئه‌وانه‌ی خۆشیان ده‌ویستی بێ تۆ ژیانیان پێ نه‌ده‌کرا.له ته‌وریزه‌وه کڕنوشیان بۆ مه‌زاره‌که‌ت ده‌برد و ده‌هاتنه‌وه ، لات .سه‌رت به‌رزو که و بڕوانه دارستانی سه‌ر سه‌رت ، بزانه چلؤن له گه‌رمای هاویندا دار قه‌زوانه‌کان به ده‌ست و په‌نجه‌ی پڕ له گه‌ڵای سه‌وز، سه‌رت بۆ داده‌نه‌وینن ، نه‌کا گه‌رمای هاوین لاقی بریندارت ئازار دات .
بڕوانه ماڵه کاگڵیه‌که‌تان ، که چلۆن له دوای دوورێت، سه‌رما و سه‌هۆلبه‌ندانی ژیانی چه‌وساوه‌کان بوونه ئازارێک و چوونه ،له شیه‌وه و کڕنهوشی برد بۆ مه‌زاره‌که‌ت و ، وه‌ک تۆ ئاویته‌ی خاک بوو.
باش ده‌زانم که چۆن قه‌ڵه‌مه‌که‌ت به رۆژێک له سابڵاخ، ڕۆژگاری دوژمنانی گه‌له‌که‌تی ، به بڕیاری خۆڕاگری و موقاوه‌مه‌ت له به‌رانبه‌ر هیرشی داگیرکه‌ران کرده شه‌و و شه‌وی ئه‌وانت کرده جه‌هه‌نه‌م و ئاگر .
هه‌رچی سه‌یر ده‌که‌م دوو شت له تۆ جیا ناکه‌مه‌وه، قه‌له‌مه‌که‌ت و چه‌که‌که‌ت ! قه‌ڵه‌مه‌که‌ت له پێناو چه‌که‌ت و، چه‌که‌که‌ت له پێناو قه‌ڵه‌مه‌که‌تا بوو ، بۆیه ڕێگات پڕ ڕێبوار و ڕێبازت هه‌ر گه‌شاوه‌یه . ئێستاش دوای بیست و هه‌شت ساڵ به سه‌ر تێپه‌ڕ بوونی بڕیاره‌که‌ت ، ڕۆله‌کانی کۆمه‌ڵه هێشتاکه هه‌ر چه‌کی پارێزگاری له وڵاتیان له شاندایه و شانازی پێوه ده‌که‌ن .
له‌م رۆژانه دا، بیرم له ئه‌وه ده‌کرده‌وه که قه‌ڵه‌مه‌که‌ت هه‌ڵگرم ، یان چه‌که‌که‌ت ؟ ئاخر هه‌ر تۆ به هێز بووی و ، ده‌ت توانی هه‌ر دووک پێکه‌وه هه‌ڵگری و ماندوو نه بی لێیان .
بڕیارم دا ، بۆ ئێدامه‌ی ڕێگات به ته‌واوی هێز و توانامه‌وه ، قه‌ڵه‌مه‌که‌ت له گه‌ڵ برێک له هاورێ یانت هه‌لگرم و چه‌که‌که‌ت له گه‌ڵ هاوڕی یانی تر !